Статя 1
Основны установліня
1. Названя обчаньского здружіня: Світовый форум русиньской молодежи (скорочені – СФРМ).
2. Помістя: Духновічів пляц 1, 081 49 Пряшів
3. СФРМ є правницьков особов, выступує у правных одношінях під своїм меном і несе одповідність, котра выплывать із тыхто одношінь.
4. СФРМ заступлять председа і підпредседа СФРМ, котры суть рядні зволены сеймом і одповідають за свою діятельность Світовій раді русиньской молодежи (скор. СРРМ) за час цілых двох років меджі двома сеймами (кідь не є установлено інакше).
5. Фінанційовы вопросы мають в своїй компетенції тоты членове СРРМ, котрых к тому призначіть самотна СРРМ або сейм.
6. СФРМ ся рядить платныма законами країны, в котрій є зареґістроване, єй всеобщо платныма приписами, меджінародныма договорами платныма у світі, Деклараційов людьскых прав і слобод а так само тыма становами.
Статя 2
Посланя і цілі
1. СФРМ зєдночує побывателів як індівідуалны особы без розділу поголовя, реліґії і расы а то з рядів русиньской молодежи од 12 до 30 років із різных країн світа, де жыють Русины, но так само молодых сімпатізантів спомеджі другых народів, ці етнік. Заєдно з тым сокуплює правны особы із другых штатів, в котрых споминаны екзістують і суть рядно зареґістрованы.
2. Посланьом СФРМ є вести, коордіновати і зєдночовати молодых Русинів і правны особы, в котрых пособлять і розвивають діятельність.
3. Діятельність СФРМ ся замірює на:
• актівну пропаґацію намірів, дотыкаючіх ся комплексного піднятя молодых Русинів у вшыткых країнах, де Русины жыють і пособлять;
• на обнову ідентіты тых молодых Русинів, котры были під вплывом бівшостьового народа домовской країны асімілованы і не голосять ся за принадлежачіх ку свойому русиньскому народу;
• на пропаґацію історії, културы, языка, реліґіозівности, фолклору, традіцій, шпорту і вшыткого, што прямо, ці непрямо є споєне із Русинами а то через доступны інформачны средства, як телевізія, радіо, інтернет, преса і через особный вплыв;
• рівномірне утримльованя контактів членів СФРМ із поєдиныма молодежныма орґанізаціями дома і в заграничю а тыж із єднотливцями;
• можну інтервенцію і лобінґ в областях посполитой сполоченьской діятелности, котра буде на основі рішіня выбору узнана за нутне рішіня при засягу в подаєдных країнах в розсягу, схваленім СРРМ;
• на підпору і мобілізацію вшыткых орґанізацій, інштітуцій, фізічных і правовых особ, котры дійствують будьякым способом, формов і в будьякій области при розвою націонално-културного пнутя молодых Русинів у світі а то простредництвом фінанчной і матеріалной помочі в розсягу, схваленім сеймом або СРРМ;
• актівну дописовательску діятельность і публікачну діятельність в русиньскых періодіках із присмотріньом на часопис Русин, выдаваный СКР;
• выдаваня періодічной і неперіодічной пресы, інформачных і пропаґачных матеріалів у русиньскім языку;
• бой проти дроґам, алкоголізму і далшым проявім залежностей, котры огрожують молодых людей;
• орґанізованя лекцій, семінарів, выстав, сімпозії, бісід і културно-посполитых, ці шпортовых акцій із заміряньом на молодеж.
Статя 3
Орґанізачна штруктура
А) Членство
• Членство у СФРМ є добровольне і на основі согласу із Становами СФРМ.
• До СФРМ можуть быти прияты фізічны і правны особы, котры:
- дійствують при оброді народной ідентіты Русинів із заміряньом на молоду ґенерацію;
- хранять і розвивають русиньскый язык;
- підпорують розвой сполупрацы меджі молодыма Русинами і другыма народами і народностныма сполками в смыслі законодарства штату, де пособлять і меджінародных договорів о меншынах.
• Членом СФРМ ся можуть стати правницькы особы молодых Русинів, котры не перевершыли вік 30 років, котры суть рядно зареґістрованы у своїй країні подля єй платных законів і зарівно з тым о членство пожадають пісемнов формов СРРМ. Тота предложене членство зважить і передложыть сейму їх приятя на схваліня.
• Членом СФРМ не може быти нияка молодежна секція будькотрой орґанізації.
• В разі екзістенції веце орґанізацій в будькотрій країні, о множестві делеґатів рішать СРРМ, покыль не буде проявлена властна ініціатіва принадлежных орґанізацій договорити ся інакше.
• До СФРМ не можуть быти прияты політічны орґанізації і конфесійовы сполкы, зато же СФРМ є културно-сполоченьскым -народностным зєдночіньом.
Б) Орґаны здружіня
1. Сейм СФРМ
• Найвысшым орґаном СФРМ є сейм, котрый ся скликує раз за 2 рокы паралелні із Світовым конґресом Русинів (скорочено СКР), кідь не є установлено інакше і є способный дійствовати за участи надполовинной бівшости номінованых делеґатів сейму.
• Міморядный сейм ся сходить, як о то пожадать надполовинна бівшість членів, што завязує його предсідателя і членів СРРМ скликати сейм.
• Сейм заголосовлює і схвалює проґрам засіданя, становы план діятелности СФРМ і СРРМ до найблизшого сейму, вырішує о плані роботы і послідовности кроків волить СРРМ і ревізора, рішать і схвалює членство кандідатів.
• О множестві делеґатів на сеймі ся рішать на посліднім засіданю СРРМ перед наслідным СФРМ.
• Неасоційованы зєдночіня можуть быти притомныма на СФРМ лем як гості без права голосованя.
• Вік делеґата сейму є в розтягу од 16 до 30 років.
• Рішіня сейму суть платны в добі до одбываня ся найблизшого сейму, кідь меджітым не быв скликаный міморядный сейм.
• Делеґатів членове волять на основі приятого ключа в поєдиных країнах.
2. Світова рада русиньской молодежи (перед тым і далше – СРРМ)
• Є выконовательным орґаном СФРМ і забезпечує діятельность зєдночіня меджі сеймами, котры скликує, приправлює і надношать його проґрам, предкладать спрваву о своїй діятельности меджі сеймами і рамцьовый план діятельности до найблизшого згромаджіня.
• СРРМ є творена по єднім заступцови із каждой країны, котра є законно схваленым членом СФРМ.
• Вік делеґата, котрый ся може стати членом СРРМ є становленый в розтягу 18 – 30 років.
• Мандат члена є чінный од часу зволіня новой СРРМ аж до часу зволіня новой на насліднім вряднім сеймі.
• Як з мімоврядных прічін член СРРМ не може надалше выконовати свою роботу у тім орґані, делеґаты країны, з котрой член походить, зволять спомеджі участників предшественного сейму нового заступителя до СРРМ.
• Новозволена СРРМ спомеджі своїх членів іщі в часі
сейму волить председу, підпредседу і ревізора надполовиннов бівшістьов голосів членів СРРМ а выслідок подасть публічно перед пленом сейму.
• Смертьов члена СРРМ його повинности і права в добі до ходу найблизшого сейму переберать на себе заступлюючій намістник, котрого волять члены домашньой країны з делеґатів предшественного сейму.
• СФРМ може заникнути на основі рішіня надполовинной бівшости делеґатів сейму позад наслідного одсогласіня дотовдішньім сеймом врядні зволеной СРРМ.
В) Председа і підпредседа СРРМ
• Председа СРРМ єсть зарівно штатутарным заступцьом СФРМ, веде і орґанізує його діятельность, заступлює зєдночіня перед посполитостьов і в медіях.
• Скликує рівночасны засіданя СРРМ, як правило два раз до рока, при вынимковых прічінах ай частіше, веде засіданя СРРМ і сейму одповідать за реалізацію рішань сейму і СРРМ.
• Підпредседа заступлює председу в розсягу назначенім председу, в разі смерти председы в повнім розсягу.
• Председа меном СФРМ створює еврове або девізове банкове конто і тримле підписове ай діспозіційове право.
• В непритомности або з важных прічін повірить підписовым і діспозіційовым правом зволеного підпредседу або другого члена СРРМ подля властного зважіня.
Г) Ревізор
• Є контролным орґаном здружіня, контролює дотримованя станов зєдночіня його орґанами, господаріня із фінанційовыма средствами і далшым матеріалным маєтком СФРМ.
• Подавать справу о выслідкох выконаных контролей раз за два рокы на засіданю сейму і зарівно в разі жаданя його членами СРРМ.
• Ревізор має право на неплановану і наперед недоговорену ревізію.
Ґ) Права і повинности
• Каждый член здружіня мать право зучастньовати ся на засіданях СФРМ а тыж:
- волити і быти воленым до ведучіх функцій здружіня і вшыткых його орґанів в смыслі обмеджінь, наведженых у тыхто становах;
- давати різне припоручаня в часі їднать і выядрьовати свій погляд на діятельність здружіня.
• Задачов каждого члена є знати становы здружіня, дотримовати їх і активні ся поділяти на діятельности здружіня, пропаґовати цілі, задачі і діятельність здружіня в рядох русиньского жытельства , платити членьскы платобкы подля договору у СРРМ.
Статя 4
Маєток і господаріня
1. Фінанції СФРМ ся складають із:
- членьскых платобків,
- властной господарьской і едіційной діятельности,
- штатной дотації і фінанцій штатной справы,
- дотацій од різных надацій і орґанізацій,
- здіденых дарів і подобні.
2. Фінанції суть вложены у банці на обычайнім або девізовім конті.
3. Маєток зєдночіня ся ужывать на реалізацію посланя і цілей здружіня і на забезпечіня діятелности здружіня і його орґанів.
Статя 5
Заникнутя здружіня
СФРМ може заникнути добровольным розпущіньом на пропозіцію СРРМ, як то одголосує надполовинна бівшість притомных делеґатів рядного або міморядного сейму СФРМ. В тім разі тыж сейм СФРМ вырішить о далшім нарабланю із надобытым маєтком орґанізації і призначіть ліквідатора. Заникнутя здружіня уповістить до 15 днів Міністерству внутра СР.
Статя 6
Завершалне установліня
Тоты становы надобывають учінок дньом їх схваліня Міністерством внутра Словеньской республикы.